«Ցանկացած աղջկա համար էլ հոր կորուստը ծանր է». «Միսս տիեզերք»-ում Հայաստանը ներկայացնող Մոնիկա Գրիգորյանը՝ կյանքի ծանր փուլը հաղթահարելու մասին

«Ցանկացած աղջկա համար էլ հոր կորուստը ծանր է». «Միսս տիեզերք»-ում Հայաստանը ներկայացնող Մոնիկա Գրիգորյանը՝ կյանքի ծանր փուլը հաղթահարելու մասին

21-ամյա Մոնիկա Գրիգորյանն այս տարի Հայաստանը կներկայացնի «Միսս տիեզերք» մրցույթում: Օրերս Մոնիկան նոր ֆոտոշարք է իրականացրել, որը տրամադրել է Tert.am Life-ին և զրուցել հրեշտակի կերպարի, մրցույթին պատրաստվելու, հոր կորստի և քթի պլաստիկ վիրահատության մասին:

Մոնիկան նշեց, որ ֆոտոշարքի միտքն իրենն էր, որն իրագործելու համար դիմել է լուսանկարչին: «Նկարահանումներն իրականացրել ենք հրեշտակների ձոր կոչվող վայրում: Լուսանկարներում կանգնած եմ բավականին բարձր ժայռի վրա, բայց չէի վախենում, առհասարակ, վախեր չունեմ: Որոշեցի հրեշտակի կերպարով լինել, որովհետև ինձ պատկերացրի այդ կերպարում:

Այս ֆոտոշարքը տարբերվում է իմ նախորդ ֆոտոշարքերից, որովհետև կերպար ու բնություն ենք լուսանկարել, դեմքս գրեթե չի երևում: Լուսանկարվել շատ եմ սիրում, թեև առաջ տեսախցիկի հետ աշխատել չէի կարողանում: Այնքան ֆոտոշարքեր ունեցա, մինչև սովորեցի, նաև ներքին մի բան փոխվեց: Այս ֆոտոշարքում շատ քիչ դիմահարդարմամբ եմ, չեմ ձգտում միշտ դիմահարդարված լինել, կատարյալ երևալ»,- ասաց նա:

Մոնիկան ծննդով Վանաձորից է, քույր և եղբայր ունի։ Ասում է՝ հպարտանում են իրենով: «Նրանք ինձ սատարում են ցանկացած հարցում: Եթե չլինեին, այսքան համարձակություն չէի հավաքի և մրցույթին չէի մասնակցի: Գոհարի առաջարկն անսպասելի էր, որովհետև մեկ տարի դադարի մեջ եմ եղել, աշխատելու շատ տեղ ունեի:

Առաջարկն ընդունելն ինձ համար բարդ էր: Իմ ու Գոհարի հարաբերությունները շատ լավ են, նա կարծես իմ երկրորդ մայրը լինի, տալիս է նույն խորհուրդները, ինչ մայրս: Ասում է, որ պետք է համարձակ լինեմ, չտրվեմ էմոցիաներին, մարդկանց հետ շփվելիս զգոն լինեմ, ժպտամ: Մենք լրացնում ենք մեկս մյուսին, մեր միջև երբեք որևէ կոնֆլիկտ չի եղել»,- պատմեց նա:

Մոնիկան ընդգծեց, որ որքան մոտենում է «Միսս տիեզերքի» օրը, այնքան իր հուզմունքը շատանում է, բայց փորձում է նախապատրաստական աշխատանքներից բավականություն ստանալ: «Ինձ վրա մեծ պատասխանատվություն է դրված, պետք է փորձեմ արդարացնել հայ ժողովրդի, Գոհարի սպասելիքները:

Այս պահին նախապատրաստական աշխատանքներն ու դասերս համատեղել չեմ կարողանում, բայց դասախոսներս ըմբռնմամբ են մոտենում բացականերին: Իրականում, լեզվաբանի իմ մասնագիտությունն այս պահին ինձ շատ է օգնում, որովհետև մրցույթին պետք է անգլերենով հաղորդակցվեմ:

Հիմա Ամերիկայի Միացյալ Նահանգներում գտնվող մասնագետների հետ տեսազանգեր եմ ունենում, աշխատում ենք խոսքիս վրա, որովհետև «Միսս տիեզերք» մրցույթում շեշտը դրվում է կնոջ խոսքի վրա: Ես կարող եմ անգլերենով ազատ հաղորդակցվել»,- վստահեցրեց նա:

Գեղեցկուհու տիտղոսակրի հայրը մահացել է, երբ նա եղել է ընդամենը 10 տարեկան: Մոնիկան որոշել է այդ մասին խոսել «Միսս տիեզերք» մրցույթի ժամանակ: «Մրցույթում բարձրաձայնելու եմ ինձ համար ցավոտ թեմայի մասին, որով ոչ ոքի հետ չեմ կիսվում, բայց հիմա ուզում եմ պատմել բոլորին: Թող մարդիկ իմանան, որ բոլորիս կյանքում էլ դժվարություններ են լինում, նույնիսկ հարազատի կորուստը պետք է հաղթահարել, առաջ շարժվել, չկոտրվել:

Ինձ շատ է օգնել մայրս, նա կարծես տղամարդ-կին լինի, շատ ուժեղ է, եթե նա չլիներ, գուցե այդ դեպրեսիայից դուրս չգայինք: Ցանկացած աղջկա համար հոր կորուստը ծանր է, մեջքդ կոտրվում է, օգնող մարդ չես ունենում: Հորս մահից հետո ավելի ուժեղ, ինքնուրույն եմ դարձել, սկսել եմ գնահատել մորս՝ մեր հետ տարած աշխատանքը»,- ասաց նա:

Մոնիկան նաև քթի պլաստիկ վիրահատության է դիմել: Նա շեշտեց, որ այդ քայլը չի արել ցածր ինքնավստահությունից ելնելով: «Իրականում, ինքնավստահության հետ կապված որևէ խնդիր չեմ ունեցել: Տարիներ առաջ թենիս խաղալիս քույրս գնդակով հարվածել էր քթիս, ոսկորը թեքվել էր, ազդում էր շնչառությանս վրա:

Դիմեցինք բժշկի, ասաց, որ 18 տարին լրանալուն պես պետք է անհապաղ վիրահատություն անենք, քանի որ թեքությունն ազդում էր առողջական վիճակիս վրա: Այդպես որոշակի շտկումներ արեցի, բայց քթիս ձևը շատ չի փոխվել, լուսանկարներս պահպանել եմ, համացանցում տեղադրում եմ, որ մարդիկ տեսնեն»,- եզրափակեց նա:

Նյութի աղբյուր – tert.am/life

Поделиться ссылкой:

Թողնել պատասխան