Երիտասարդ երգչուհի, դերասանուհի Դիանա Մխիթարյանը լսարանին հայտնի դարձավ «Անհասցե ծնվածները» հեռուստասերիալից, որը դեռևս նրա միակ դերասանական փորձն է եղել։ Այս շրջանում Դիանան չի ներկայանում որպես դերասանուհի: Tert.am Life-ի հետ զրույցում նա պատմել է ներկայիս զբաղվածության, առաջիկա ծրագրերի, նոր մասնագիտություն ձեռք բերելու և Կարեն Ասլանյանի հետ համագործակցության մասին:
Դիանան որոշել է իրեն փորձել մեկ այլ բնագավառում և համալսարան է ընդունվել․ «Սովորում եմ կառավարում, բանկային գործ, առաջին կուրսի ուսանող եմ: Մանկուց սիրել եմ բանկային գործը, միշտ երազել եմ իմանալ, սովորել, աշխատել, բայց հանգամանքներն այլ կերպ են դասավորվել:
Որոշեցի փորձել, գուցե, հետագայում աշխատեմ այդ մասնագիտությամբ: Համալսարանում դասերը շատ հետաքրքիր են անցնում, ինքս բնավորությամբ այնպիսին եմ, որ եթե ինչ-որ առարկա ինձ դուր չգա, չեմ սովորի: Քանի որ սիրում եմ մասնագիտությունը, ամեն ինչ ավելի հեշտ է տրվում ինձ»:
Նրա խոսքով՝ երգով ևս զբաղվում է, հաճախում է վոկալի դասերի: «Ուզում եմ նաև զինվորի մասին երգ ունենալ։ Հիմա աշխատում եմ նոր երգի վրա, բայց չգիտեմ, թե երբ կթողարկեմ: Չեմ ուզում այս շրջանում ակտիվ լինել երգի ասպարեզում, որովհետև չգիտեմ՝ ի՞նչ անել, որպեսզի չքննադատվի, մարդկանց կողմից ճիշտ ընկալվի:
Բացի երգչուհու մասնագիտությունը, կարծում եմ՝ պետք է, անպայման, ունենալ մեկ այլ մասնագիտություն: Միշտ չէ, որ իմ մասնագիտությամբ կարող եմ աշխատել, հաստատուն չէ, սիրողական գործ է: Ես մի փոքր այլ մտածելակերպ ունեմ, սիրում եմ երգել, այդ ամենն ինձ դուր է գալիս, բայց ուզում եմ նաև այլ մասնագիտություն ունենալ, որն ինձ հաստատ չի խանգարի»,- ընդգծեց նա:
Երիտասարդ երգչուհին նկատեց, որ բացի երգը, նկարահանումները և բանկային գործը, սիրում է ժամանակ անցկացնել նաև խոհանոցում: «Սիրում եմ ազատ ժամանակ խոհանոցում լինել, կարծում եմ՝ յուրաքանչյուր աղջիկ էլ խոհանոցի հանդեպ սեր ունի: Սիրում եմ տարբեր ուտեստներ, խմորեղեններ պատրաստել:
Երբ համացանցում ինչ-որ հետաքրքիր բաղադրատոմս եմ տեսնում, անպայման փորձում եմ՝ համե՞ղ է ստացվում, թե՞ ոչ: Իմ պատրաստած ուտեստները մայրս է փորձում, կարծիք հայտնում, նա շատ համեղ քաղցրավենիքներ է պատրաստում, նրանից եմ սովորում»,- ասաց դերասանուհին:
Դիանան նաև շեշտեց, որ հայտնի դառնալուց հետո իր կյանքում շատ փոփոխություններ չկան: «Ուղղակի «Անհասցե ծնվածները» հեռուստասերիալում նկարահանվելուց առաջ շատերը ինձ ճանաչում էին որպես երգչուհի, հետո այդ լսարանը մեծացավ և ինձ սկսեցին ճանաչել նաև որպես դերասանուհի: Նույնիսկ մարդիկ կան, որ չգիտեն՝ ես երգչուհի եմ, մտածում են՝ դերասանուհի եմ:
Այդ հեռուստասերիալն իմ առաջին աշխատանքն էր, անսպասելի ստացվեց, առհասարակ, կյանքում ստացվում է այն, ինչին չեմ սպասում, թեև սերիալում նկարահանվելու ցանկություն միշտ եմ ունեցել: Աշխատելու արդյունքում սկսեցի հոգալ իմ ծախսերը, ներքին ինքնավստահություն ձեռք բերեցի:
Հաճելի էր, երբ առավոտից գնում էի աշխատանքի, վերադառնում ուշ գիշերին, հոգնում էի, բայց գիտեի՝ վաստակում եմ իմ սեփական գումարը: Հիմա ինձ համար դժվար է, չեմ աշխատում, մեծ ցանկություն ունեմ ինչ-որ աշխատանք գտնել»,- նշեց նա:
Հարցին՝ չի՞ ցանկանում կրկին նկարահանվել, Դիանան պատասխանեց. «Ուզում եմ նորից նկարահանվել, գիտեմ, որ առաջարկներ եղել են, բայց այդ հարցերով զբաղվում է իմ պրոդյուսեր, դերասան Կարեն Ասլանյանը: Նա է որոշում՝ որն է ճիշտ, որը՝ սխալ»:
Այսպիսով` Դիանան պատասխանեց նաև վերջերս շրջանառվող խոսակցություններին, թե ինքն ու Կարենը դադարել են համագործակցել․ «Շարունակում ենք համագործակցել, ուղղակի համատեղ նոր նախագծեր այս ընթացքում չենք ներկայացրել, չգիտեմ՝ հետագայում կլինե՞ն, թե՞ ոչ, այդ հարցերով ևս Կարենն է զբաղվում»:
Նյութի աղբյուր – tert.am/life
